ငါးနှစ်သားရွာလူကြီးလေး

စာညွှန်း

ကမ္ဘာပျက်ကပ်အတွင်းမှ ဖုတ်ကောင်ဘုရင်မလေးဖြစ်သော ရှီရှောင်ကျိုးတစ်ယောက် တစ်နေ့မျက်လုံးဖွင့်ကြည့်လိုက်ရာ မိမိကိုယ်ကိုထောင်ယွမ်ကျေးရွာ၏ရွာသူကြီးအဖြစ်ရောက်ရှိနေကြောင်း မမျှော်လင့်ဘဲသိလိုက်ရလေသည်။ သူမစိတ်ထဲတွင်မူ အရည်အချင်းရှိသောရွာသူကြီးတစ်ဦးဖြစ်လာစေရန် အစဉ်အမြဲစောင့်ကြည့်ပေးနေသည့် စနစ်တစ်ခုလဲရှိနေသေး၏။ ရှောင်ကျိုးမှာဆုလာဘ်အဖြစ်အမှတ်များရရှိရန် ပေးအပ်ထားသည့်တာဝန်များကို ကြိုးပမ်းထမ်းဆောင်ရပေမည်။

သို့သော် တစ်နေ့၌ရန်သူ့စစ်တပ်များ ကျူးကျော်တိုက်ခိုက်လာသဖြင့် အေးချမ်းလှသောကျေးရွာလေးမှာ ပျက်စီးခြင်းသို့ ရောက်ရှိသွားခဲ့ရလေသည်။

ထိုအခါမှာတော့ရှောင်ကျိုးတစ်ယောက် အကြီးအကျယ်ဒေါသထွက်သွားပါတော့၏။

"လူကြီးလူကောင်းဆိုတာ ကလဲ့စားချေဖို့ ဆယ်နှစ်စောင့်လည်းမနှောင့်နှေးဘူးဆိုတာတွေက အပိုတွေပဲ၊ငါကတော့ မနက်ကနေ ညအထိမနားတမ်း ကလဲ့စားချေပြမယ်"

"အကြမ်းဖက်မှုနဲ့တင်အရာရာတိုင်းကိုဖြေရှင်းလို့ရနေတာပဲလေ၊ဘာလို့ကျိုးကြောင်းဆီ‌လျော်မှုတွေ‌အကြောင်း ပြောနေဦးမှာလဲ"

ထိုအချိန်မှစ၍ သူမသည်ရွာသားများကို ဦးဆောင်ကာ လုယက်တိုက်ခိုက်ခြင်းလမ်းစဉ်သို့ လှည့်ဖျားခေါ်ဆောင်သွားခဲ့ပါတော့သည်။

စနစ် : "ကျေးဇူးပြုပြီး အရည်အချင်းရှိတဲ့ ရွာသူကြီးတစ်ယောက်ဖြစ်အောင် ကြိုးစားပါ"

ရှောင်ကျိုး : "ဘာမှားလို့လဲ၊ရွာသားတွေအနေနဲ့ ဝဝလင်လင်စားရတယ်၊ဝတ်ကောင်းစားလှတွေလဲဝတ်ရတယ်၊စာပေနဲ့ကိုယ်ခံပညာဘက်မှာပါ ကျွမ်းကျင်နေကြပြီပဲလေ"

စနစ် : "ဘာတွေများမှန်နေလို့လဲ၊ငါက မင်းကို ရွာသားတွေချမ်းသာကြွယ်ဝလာအောင် လမ်းပြပေးနိုင်မယ့် အရည်အချင်းရှိတဲ့ရွာသူကြီးဖြစ်စေချင်တာလေ၊လုယက်ဖို့လမ်းပြခိုင်းနေတာ မဟုတ်ဘူး"

ရှောင်ကျိုး : "ငါကမခိုးပါဘူးနော် လျှောက်ပြောမနေနဲ့၊ဒါတွေကအခြားလူတွေငါတို့ဆီကို စေတနာအလျောက်နဲ့လာပေးကြတာ"

တစ်နေ့သောအခါတွင်တော့ သူမ၏မူလအချက်အလက်အစစ်အမှန်မှာ ပေါ်ထွက်လာခဲ့ပေသည်။ ရှောင်ကျိုးတစ်ယောက် နန်းမြို့တော်အတွင်းရှိ အသုံးမကျသောသူများအားကြည့်ကာ ဤသို့ပြောလိုက်၏။

"ငါတို့အားလုံးက ဧကရာဇ်ရဲ့အနွယ်တော်တွေပဲလေ၊မင်းသားတွေတောင် ထီးနန်းလုနိုင်ရင် ငါတို့ကရောဘာလို့ မလုနိုင်ရမှာလဲ"

ရှောင်ကျိုး : "စနစ်......ရွာသူကြီးဖြစ်ဖို့ဆိုတာက အမြင်ကျဥ်းလွန်းတယ်၊ငါဘုရင်မပဲ လုပ်တော့မယ်"